VII Época - 120

SOBRE AS CONDICIÓNS

Rosi erguese ás 4:45 da mañá, de luns a sábado incluído, e algúns domingos de febre consumista. Ás 6 entra a limpar unha tenda de Zara, quero dicir, do grupo, de Inditex. A política de limpeza de Amancio Ortega é moi esixente, como corresponde a unha empresa seria, vitoriosa, protocolizada. Apertura e peche de portas, código de empregada, desconexión da alarma, etc…, isto antes de fichar, case 10 min. Vixilancia por cámaras, prohibición de mover, mirar ou tocar a feira, quero dicir, as mercadorías e os seus trebellos, o lixo en bolsas transparentes revisado pola encargada da tenda antes de sacalo á rúa, prohibición de escoitar música ou radio, o aire acondicionado apagado que como a música ambiente acendese automaticamente para a apertura de portas, cando comeza a feira, ás 10 cando chegan as “niñas” que así se lles chama ás dependentas/es na xerga. En fin, Rosi está alí ata as 9 da maña, 3 horas nas que apenas lle da tempo a limpar todo o que lle esixe o servizo. Rosi limpa a tenda con Omaira que cobra menos que ela por ter unha “discapacidade”, pola que nunca lle adaptaron o posto de traballo, só o salario, menor salario por aplicarlle un dos convenios colectivos especiais para persoas con certas condicións, eso si, recoñecidas pola administración do estado. Omaira sí traballa as 4 horas, de 6 a 10, tamén a correr. Este verano suaron o seu, a tiro feito non vos imaxinades a calor que vai dentro dos centros comerciais despois dunha noite co aire acondicionado apagado, sen embargo nada hai para sospeitar que a calor é un risco, ningunha avaliación, stress térmico que lle chaman os sindicatos, ha, ha, ha, a Don Amancio dálle a risa, non é cousa seria. Eu paso por alí unha vez á semana, entramos no centro comercial cando aínda dura a noite, sixilosamente, cando fóra hai fresco.

Todas traballamos para Florentino Pérez, aínda que cada unha para unha das súas diferentes empresas de servizos, Omaira para Integra, Rosi para Samain e eu para Clece, o patriarcado contemporáneo repartíndose a torta. Ay!, case que amorriñamos ás Koplowitz. Eu teño un contrato temporal de substitución, Rosi o mesmo e Omaira un a tempo parcial, como nós, pero indefinido. Somos como as representantes do pobo galego, aí estamos, onde só 3 de cada 10 contratos que se asinaron durante o pasado mes foron indefinidos.

Ao saír do centro comercial Rosi e Omaira van limpar casas, diñeiro en b, que non cotiza. Rosi á de unha xuíza, di ela, aínda que é un pouco esaxerada, di que a señora é marabillosa. Omaira non sei, cústalle expresarse. E eu, as veces para casa, as veces a seguir a ruta. Eso si, polas tardes vou a TGSS, Tesorería General da Seguridad Social. Alí está Yurima de 3 a 9, 6 horas, eu vou 3. Tamén están Samhi, Cuca e Márcia pero non logro memorizar os seus horarios nin lles pregunto cales son as súas condicións “recoñecidas”. Yurima ten contrato fixo e non traballa noutro lado. As demais non. A Yurima gústalle ir arreglada, conserva a presenza sen outfit, coa bata do uniforme. Con Cuca enténdome ben, fala os sete falares e nótaselle que é de Coia. A Márcia e a Shami admíroas, que vida! Márcia redímese facéndonos rir, conta que foi evanxelista, pagaba unha “siembra” de 100 $ para colleitar o perdón. Os dólares devolvíaos Deus en bendicións. Di que de nena coñeceu a Tim Maia e o Universo em desencanto, flipo. Samhi explicounos o que é a Kaffara e o Zakat. Gostamos de falar do que quedou atrás, sempre paramos para a merenda e acendemos o climatizador.

Para cando saio da Tesoureira ás 8 da noite, Rosi sae de limpar un cole en Tui e Omaira, durante o verán e ata finais de novembro, sacaba uns pavos máis, 2 horas na DGT, para o 2027 igual lle sae as oficinas e taller dunha empresa no polígono da Veigadaña.

Todas temos algo en común, somos case mileuristas, fáltannos entre 60 e 120 pavos para chegar, segundo o caso, pero atópome ben entre estas mulleres, eu diría que somos da mesma condición, unha condición de clase.

Deja una respuesta

Tu dirección de correo electrónico no será publicada. Los campos obligatorios están marcados con *