ABAI VOLVE A FACER O QUE MELLOR SABE: DESTRUÍR POSTOS DE TRABALLO E PRECARIZAR
Existe un consentimento sistémico polo que as empresas incumpren a lei laboral impunemente. Esta circunstancia está intimamente relacionada coa precariedade, aínda que ao empresariado, pola súa condición innata, interésalle diminuír e vulnerar os dereitos e condicións laborais, non se abusa por igual. Se a precariedade axuda ao empresariado, a falla de resposta sindical, xa sexa polo consentimento sistémico das corporacións sindicais ou polo abandono da consciencia da clase obreira como suxeito transformador, é o tesouro. En avanzada, no sector do telemarketin todo isto entra en xogo, un xogo inexorable.
Unha destas frontes topámola nas compas da CGT en Abai e por proximidade as de A Coruña, de onde recibimos a información que segue. Agora, pouco despois do “batacazo xudicial”, ao sentenzar o tribunal que a mobilidade xeográfica que a empresa quería impor ás traballadoras de León trasladándoas a Hospitalet é inxustificada (ver La Campana nº 73 e 69), apenas unhas semanas despois de que Abai mercara Atento EMEA, incluíndo ademais de Europa a Marrocos e Colombia, Abai volve facer o que mellor sabe: destruír postos de traballo e precarizar.
Convén deterse un pouco na singularidade desta compra/venda. Como informaron a finais do ano pasado dende CGT Telemarketin “o sector de Contact Center leva máis dunha década vivindo fusións e adquisicións que reduciron a un puñado as empresas de Telemarketin neste país, onde antes había multitude de empresas agora hai un oligopolio. Durante anos a principal empresa deste sector en España, Atento, anunciou a súa venda a Abai, unha empresa moito máis pequena. Sorprendentemente, por unha vez o peixe pequeno cómese ao grande, e un dos pequenos clientes de Telefónica (movistar), quedouse co grupo Atento que é o principal provedor deste cliente de telecomunicacións”.
Este venres 13 de marzo, a sección sindical de A Coruña comunicaba que Abai anuncia un ERE que afecta ao persoal de servizos centrais e ao da súa antiga competidora, Atento. O ERE afectará a un máximo de 163 traballadoras de 12 centros de traballo: A Coruña Juan Flórez, Barcelona Glorias, Bilbao Capuchinos, Cáceres Rodríguez Ledesma, Xaén Recinto feiral, León Ramón y Cajal, Madrid Ilustración, Madrid Rivas, Sevilla Indotorre, Toledo Valdemarías e Valencia Mediterráneo. No comunicado a sección sindical expresa o seu máis absoluto rexeitamento a “este movemento vil”. Queda destapado así que “ABAI comprou a empresa unicamente para gañar máis diñeiro cortando cabezas” denuncia a sección.
Nestas páxinas temos incidido nas estratexias de Abai para desmantelar os centros de traballo que ten no Estado Español e trasladar os servizos a outros países, “porque alí as condicións laborais son aínda máis penosas, as condicións salariais son aínda máis lamentables, o que lles permite aumentar a marxe de beneficios”, comentábanos Adrián, delegado sindical da CGT, nunha recente entrevista onde expoñía o maltrato a que son sometidas as traballadoras de Abai. Esta estratexia desmanteladora “viuse co ERTE estatal, a mobilidade xeográfica en León e o acoso a compañeiras para que abandonen o seu posto” aclara pola súa parte o comunicado.
A pesares da impunidade coa que Abai acosa e corta cabezas, “cabe lembrar que estas agresións non serían posibles sen a complicidade das grandes compañías que contratan os seus servizos, como Telefónica, nen sen unha lexislación laboral amparada por CCOO e UGT, que permite a empresas con beneficios millonarios plantexar un ERE”, as compas de A Coruña pelexaran na fronte, “enviamos un aviso á mafia: non contedes coa CGT para despedir nin precarizar as condicións laborais nin salariais de ningunha traballadora. Lerchos!” lemos no final do comunicado.