A CGT DE CORREOS EN PÉ DE LOITA

No anterior comité local os compañeiros traballadores da empresa pública estatal Correos informábannos da grave situación que veñen sufrindo e da deixadez da dirección de Correos. Unha deixadez que leva cara o desmantelamento cada vez maior do servizo postal público. Non é nada novo, xa avisarannos en anteriores comités locais da, por exemplo, inclusión do persoal de Correos nun Real Decreto de Xornadas Especiais, equiparando así a correos coa hostalaría. A inclusión do persoal de Correos neste Real Decreto suporía a desregularización da xornada laboral de luns a venres en unha de luns a domingo, legalizando así o incumprimento dos mínimos de descanso e xornada que dita o estatuto dos traballadores.

A esta ameaza hai que sumarlle as sobrecargas de traballo continuadas debidas a falla de contratación que están levando á precarización deste servizo público. Así a unidade de reparto de Sabadell declarou unha folga indefinida que veñen realizando dende o pasado 6 de Abril e que está a estender a loita dentro de correos. A folga é total en canto é secundada por todos os traballadores da oficina de Sabadell. Ademais estes compañeiros de Sabadell acusan á xefatura local de Correos de falsificar datos relativos á entrega de notificacións administrativas. Tamén denuncian o incumprimento da lei de prevención de riscos laborais. Ademais tamén denuncian que se prioriza o reparto da paquetería urxente, que a día de hoxe é un servizo privatizado, en detrimento de garantir a prestación pública do servizo postal universal.

A plantilla de Sabadell sae diariamente as rúas para que se visibilize a súa situación e a de correos en xeral. Teñen visitado e recibido solidariedade de moitas asociacións de veciños afectados, que son uns 70.000. O pasado mércores 14 de abril mobilizáronse en Barcelona diante do edificio da Xefatura Provincial. Alí un compañeiro e unha compañeira do comité de folga entrevistáronse coa xefa de relacións laborais sen chegar a ningún acordo. Esixen a contratación de doce traballadores de xeito estable. Tamén presentaron unha denuncia na Inspección de traballo por acoso laboral de Correos á plantilla de Sabadell xa que reúnense todos os requisitos para poder presentar esa denuncia.

As concentracións e folgas parciais polos mesmos motivos están a estenderse por todo o territorio, aínda que en moitos lugares tropezan coa desidia e complicidade das corporacións sindicais coa dirección privatizadora da empresa. Sen embargo en Almería CGT e SIPCTE convocan unha folga xeral en Correos para toda a provincia do 21 ao 23 de Abril contra o desmantelamento do servizo postal público e o recorte dos empregos. Nunha nota conxunta dos dous sindicatos din que “os carteiros de Almería dixeron ¡xa abonda!”, e xustifican a decisión de convocar a folga polo cansazo que acumula o persoal. “Estamos exhaustos”, din os convocantes que denuncian “escaseza de medios humanos e ás veces ata materiais”. Acusan a Correos de provocar, por estes motivos, “unha sobrecarga sistemática de traballo, de esgotamento físico e emocional dos carteiros”. Denuncian a existencia “de contratos en fraude de lei, das altas taxas de temporalidade, de oficinas onde é imposible traballar dignamente, de non dar abasto no reparto”.

Por todo isto os carteiros decidiron mobilizarse e levar a cabo unha folga de tres días, co fin de esixir a Correos: “Non aos recortes de persoal, aumento da contratación, unha sección un traballador, non somos animais de carga”. Ambos sindicatos mantiveron reunións con Correos que non serviron para que a entidade atenda as súas reivindicacións. Ata, denuncian non ser atendidas as reivindicacións levadas ante “os xuíces árbitros do SERCLA no acto de conciliación previa celebrado o pasado venres”. Ambas centrais sindicais din que non hai marcha atrás.

Outra vez máis a CGT mobilizase para defender os dereitos dos traballadores, contra a privatización dos chamados servizos públicos estatais e chamando á rebeldía como xeito de mudar unha deriva cada vez máis capitalista, individualista, autoritaria, inhumana…

Deja un comentario

Tu dirección de correo electrónico no será publicada. Los campos obligatorios están marcados con *