A CGT CHAMA Á MOBILIZACIÓN O 8 DE MARZO NA CORUÑA

A Confederación Xeral do Traballo (CGT) na Coruña envía a La Campana o chamamento a participación na manifestación do 8 de marzo.

Este ano, o sindicato centra a súa atención no avance do fascismo, o racismo e o colonialismo, ameazas que afectan especialmente ás mulleres.

Segundo CGT A Coruña, estas formas de opresión maniféstanse a través de guerras, ocupacións, xenocidios e perda de dereitos da clase traballadora, mantendo un sistema capitalista e patriarcal sustentado na explotación e na represión. Ademais, o sindicato denuncia os feminicidios e a violencia machista, económica e institucional que sufren as mulleres. Como principais reivindicacións de CGT Coruña para o 8M:

Fin de todas as violencias machistas, incluidos feminicidios e violencia vicaria, con políticas reais de prevención, protección, reparación e recursos suficientes.

Erradicación da división sexual do traballo e da brecha salarial e de pensións.

Creación dun sistema público de coidados comunitario, universal e gratuíto.

Acceso a vivenda digna, alimentación e subministracións básicas.

Protección efectiva fronte a calquera crise social ou económica.

Erradicación de todas as formas de discriminación cara a mulleres, persoas disidentes e LGTBIQA+.

Fin da violencia institucional que criminaliza e desprotexe especialmente a mulleres, persoas migrantes e colectivos en loita.

Derrogación da reforma laboral, das reformas de pensións e da lei mordaza.

Redución da xornada laboral a 30 horas.

Visibilidade e representación equitativa de mulleres e persoas non binarias en todos os ámbitos.

Promoción dunha sociedade inclusiva e non capacitista, respectuosa coa diversidade funcional e cos corpos non normativos.

Políticas reais de coeducación, formación e sensibilización en igualdade.

Regularización de todas as persoas migrantes, derrogación da lei de estranxeiría, peche dos CIE e fin das deportacións.

Medidas urxentes fronte á emerxencia climática desde a xustiza social.

A CGT A Coruña lembra que, fronte ao fascismo, non hai neutralidade e que a resposta debe ser colectiva, feminista e sen fronteiras, actuando tanto nas rúas como nos centros de traballo e nos demais espazos da vida social.

Fonte: Pilar Pérez (CGT A Coruña)